Schläckmüüli - Ä Sünd wärt

Glehrt hani öppis ganz angers aus Konditorin... - i schaffe dr ganz Tag im Büro u hocke mehrheitlech vorem Computer.

Im Novämber 2012 bini spontan vo Bärn nach Schaffhuse gfahre, für amne Turteverzierkurs teil ds näh. Das isch dr Uslöser gsi für mis nöie Hobby.
Mini erschti Motivturte het mis Mami zu ihrem Geburtstag übercho. Es het ä ganz bsungere u persönleche Chueche söue gä. Iri Lideschaft für Piuze hetmer de o d Idee gä, ire ä Turte i Piuzform ds mache.
Sit denn beschäftige i mi mit däm Thema "Turte verziere". D Turtene woder hie uf mire Site gseht, hani für mini Familie, für Fründe, Bekannti u Fründe vo Bekannte kreiert - gässe hani die nid aui elei, o weni säuber äs Schläckmüüli bi ;-)

Im Louf vo dr Zyt het sich mi Stiu veränderet u i lehre o loufend Nöis derzue. Aber mini erschti Motivturte liebi no immer!

I bi scho immer öpper gsi, wo gärn bachet u baschtlet het. Itz chani das kombiniere u mi mit de Chüeche kreativ ustobe.

Foto: Brigitte Mathys

♥ ♥ ♥ NEU ♥ ♥ ♥

Aui Föteli fingeter uf Facebook - ä Blick dri lohntsech!